Passage: [nko]ߒߞߏ ߞߊ߲ ߝߐߟߊ ߎ߬ ߣߴߊ߬ ߝߐ ߦߙߐ ߎ߬[/nko]

ߊ߬ ߓߌ߬ ߝߐߟߌ߫ ߟߊ߫߸ ߒߞߏ ߝߐߟߊ ߎ߬ ߦߋ߫ ߡߊ߬ߘߋ߲ ߎ߬ ߘߋ߬ ߦߋ߫ ߡߍ߲ ߠߎ߬ ߝߍ߲߬ߛߍ߲߬ߣߍ߲߫ ߝߙߊ߬ߝߌ߲߬ߠߊ߫ ߕߟߋ߬ߓߋ ߕߊ߲ߓߊ߲ ߘߐ߫، ߊ߬ߟߎ߬ ߟߊ߫ ߞߣߍ ߏ߬ ߡߊߞߍߣߍ߲߫ ߞߌ߬ߢߍ߬ߞߏ߲ߞߏ ߣߌ߫ ߕߎߝߌ߲ ߠߋ߬ ߕߍ߫ ߞߐ߰ߘߎ߮ ߣߌ߫ ߥߙߏ߬ߘߎ߮ ߘߐ߫، ߊ߬ ߣߌ߫ ߤߊߥߎߛߊߘߎ߯ ߣߌ߫ ߖߏ߬ߟߊ߬ߘߎ߯ ߕߍ߫ ߕߟߋ߬ߓߐ ߣߌ߫ ߕߟߋ߬ߓߋ ߘߐ߫· ߡߊ߲߬ߘߋ߲ ߠߎ߬ ߛߌߦߊߦߊ߫ ߦߙߐ ߦߙߍߞߍߣߍ߲߫ ߖߡߊ߬ߣߊ߫ ߞߐ߬ߣߐ߲߬ߘߐ߫ ߟߋ߬ ߕߍ߫ ߛߌߛߍ߲߬߸ ߏ߬ ߟߎ߬ ߝߟߍ߫ ߣߌ߬: ߡߊߟߌ߫، ߖߌ߬ߣߍ߫، ߞߘߏߥߊߙߌ߫، ߜ߭ߊ߲ߓߌ߫، ߓߙߎߞߌߣߊ߫ ߝߊ߬ߛߏ، ߛߣߍ߬ߞߊߟߌ߫، ߛߙߊ߬ߟߏ߲߫، ߟߊߓߙߌߦߊ߫، ߊ߬ ߣߌ߫ ߖߌ߬ߣߍ߫ ߓߌ߬ߛߊߏ߫. ߝߣߊ߫߸ ߡߊ߲߬ߘߋ߲ ߠߎ߫ ߝߣߊ߬ߝߣߊ ߦߋ߫ ߜ߭ߊ߯ߣߊ߫ ߣߌ߫ ߖߋ߬ߟߌ߬ߓߊ߬ߘߎ߯ ߣߌ߫ ߡߙߎߕߊߣߌ߫ ߟߎ߫ ߘߐ߫ ߤߊߟߌ߫ ߓߌ߬، ߡߊ߲߬ߘߋ߲߫ ߡߌ߬ߙߌ߲߬ߘߌ ߣߌ߫ ߦߙߐ ߏ߬ ߕߊ ߟߐ߲ߠߌ߲ߦߊ ߣߴߊ߬ߟߎ߬ ߟߊ߫ ߘߐ߬ߝߐ ߟߎ߫ ߘߏ߲߬ߣߍ߲߬ ߢߐ߲߮ ߘߐ߫ ߘߊߜߟߏ ߏ߬ ߟߎ߬ ߟߊ߫߸ ߒ߬ߓߊ߬ ߡߊ߲߬ߘߋ߲߫ ߡߌ߬ߙߌ߲߬ߘߌ ߝߍ߲߬ߛߍ߲߬ ߢߊ ߣߌ߲߬ ߘߐ߫߸ ߊ߬ ߛߟߋߞߋ ߓߍ߯ ߡߊߟߐ߲ߣߍ߲߫ ߞߐ ߢߌ߲߬ ߠߊ߫ ߊ߬ ߘߎ߲߬ߘߎ߬ߡߊ߬ ߕߐ߯ ߟߋ߬ ߟߊ߫߸ ߊ߬ ߞߋߟߋ߲ߞߋߟߋ߲ ߓߍ߯ ߦߋ߫ ߏ߬ ߡߍ߲ ߝߐ߫ ߟߴߊ߬ ߖߍ߬ߘߍ߫ ߡߊ߬߸ ߞߵߊ߬ ߝߘߏ߫ ߕߐ߬ߡߊ ߟߎ߬ ߝߣߊ߫ ߡߊ߬ ߏ߬ ߢߊ ߝߘߏ߬ߓߦߊ߬ ߓߟߏ ߡߊ߬߸ ߓߊߏ߬ ߊ߬ ߓߴ ߊ߬ߟߎ߬ ߞߣߐ߫ ߟߋ߬ ߞߏ߫ ߕߐ߬ߡߊ ߟߎ߬ ߦߴߊ߬ߟߋ ߘߏ߫ ߟߋ߬ ߘߌ߫ ߢߊ ߘߏ߫ ߞߊ߲߬. ߏ߬ ߓߟߏ ߡߊ߬߸ ߡߊ߲߬ߘߋ߲߬ ߞߘߐ߬ߓߊ ߞߣߍ ߥߙߏ߬ߘߎ߮ ߟߋ߬ ߡߊ߬ߣߋ߲߬ߞߊ߬ߟߊ߫ ߘߌ߫ ߓߌ߬ ߥߟߊ߫ ߡߊ߬ߣߌ߲߬ߞߊ߬ߟߊ߫߸ ߡߊ߬ߣߌ߲߬ߞߊ ߟߎ߬ ߓߘߊ ߞߊ߬ߣߌ߲߫. ߊ߬ ߞߐ߰ߘߎ߮ ߦߋ߫ ߓߊߡߊߣߊ߲ߠߊ߫ ߘߌ߫߸ ߥߟߊ߫ ߓߊ߲ߓߊߙߊ߲ߠߊ߫߸ ߓߊ߲ߓߊ߬ߙߊ߲ ߠߎ߬ ߓߘߊ ߞߊ߬ߣߌ߲߫. ߊ߬ ߕߟߋ߬ߓߐ ߦߋ߫ ߖߎ߬ߟߊ߬ߘߎ߯ ߘߌ߫߸ ߥߟߊ߫ ߖߎ߬ߟߊ߬ ߖߡߊߣߊ߸ ߖߎ߬ߟߊ ߟߎ߬ ߓߘߊ ߞߊ߬ߣߌ߫. ߊ߬ ߕߟߋ߬ߓߋ ߦߋ߫ ߡߊ߲߬ߘߋ߲߬ߞߏ߬ ߖߡߊߣߊ ߘߌ߫߸ ߡߊ߲߬ߘߋ߲߬ߞߏ ߟߎ߬ ߓߘߊ ߞߊ߬ߣߌ߲߫. ߏ߬ ߟߋ ߣߊ߬ ߦߙߐ ߏ߬ ߟߎ߬ ߞߊ߲ ߟߊ߲߬ߓߋ߬ ߟߊ߫ ߕߐ߮ ߏ߬ ߟߎ߬ ߟߊ߫߸ ߞߊ߬ ߞߊ߲ ߏ߬ ߟߎ߬ ߞߍ߫ ߡߊ߬ߣߌ߲߬ߞߊ߬ߞߊ߲ ߣߌ߫ ߓߡߊߣߊ߲ߞߊ߲ ߣߌ߫ ߖߎ߬ߟߊ߬ߞߊ߲ ߣߌ߫ ߡߊ߲߬ߘߋ߲߬ߞߏ߬ߞߊ߲ ߘߌ߸ ߞߵߊ߬ ߕߘߍ߬ ߜߎ ߖߊ߰ ߏ߬ ߟߎ߬ ߦߋ߫ ߞߊ߲ߓߏߟߏ߲ ߠߋ߬ ߘߌ߫߸ ߒߞߏ ߦߋ߫ ߡߍ߲ ߓߍ߫ ߝߘߏ߬ߓߊ߬ߕߐ߮ ߘߌ߫߸ ߓߊ ߏ߬ ߟߋ ߦߋ߫ ߡߊ߲߬ߘߋ߲߫ ߝߘߏ߬ߓߊ߬ߞߊ߲ ߕߐ߮ ߘߌ߫ ߞߊ߬ߦߌ߯ ߛߏ߲߬ߖߘߊ߬ ߕߟߋ ߢߍ߫߸ ߤߊߟߌ߫ ߓߌ߬ ߊ߬ߟߋ߬ ߞߊ߲ߓߏߟߏ߲ ߣߌ߲߬ ߝߋ߲߫ ߛߐ߬ߛߐ߬ ߢߊ߫ ߕߍ߫ ߊ߬ ߟߊ߫ ߒߞߏ ߝߐ ߟߊ߫߸ ߓߊ ߞߎߡߊߘߋ߲ ߏ߬ ߟߋ ߦߴߊ߬ ߓߍ߯ ߟߊߘߍ߬ ߟߊ߫ ߣߌ߫ ߢߌ߬ߣߊ߬ߓߐ߫ ߕߍ߫߸ ߡߊ߲߬ߘߋ߲߬ ߞߊ߲߫ ߜߘߍ߫ ߝߐߓߊ߮ ߘߏ߲߬ ߛߋ߲߬ ߝߣߊ߫ ߕߍ߫ ߊ߬ ߝߐ߫ ߢߊ ߏ߬ ߘߐ߫ ߡߍ߲ ߣߴߊ߬ߟߎ ߕߍ߫ ߞߋߟߋ߲߫ ߘߌ߫. ߞߙߍ߬ߝߍ߬ ߕߐ߯ ߜߘߍ߫ ߦߋ߫ ߕߌ߲߬ߞߎߘߎ߲ ߢߌ߲߬ ߠߎ߬ ߟߊ߫ ߊ߬ ߣߴߊ߬ߟߎ߬ ߞߊ߲ߓߏߟߏ߲ ߠߎ߬ ߟߊ߫߸ ߊ߲ ߘߌߣߊ߬ ߛߋ߫ ߏ߬ ߟߎ߫ ߕߐ߬ߝߍ߬ߦߊ ߡߊ߬ ߊ߬ߟߎ߬ ߦߙߐ ߟߎ߬ ߘߐ߫ ߣߌ߫ ߊߟߊ߫ ߛߐ߲߬ ߘߊ߫.

ߡߊ߲߬ߘߋ߲߫

ߡߊߣߌ߲ߞߊ

ߡߊ߲߬ߘߋ߲߫

ߡߊ߲߬ߘߋ߲߫ ߞߎߡߊߘߋ߲ ߛߏ߯ߙߏߣߍ߲߫ ߜߋ߲߬ ߝߌ߬ߟߊ ߡߍ߲ ߠߊ߫ ߏ߬ ߓߍ߯ ߣߴߊ߬ ߕߊ߫ ߞߘߐ߫ ߟߋ߬߸ ߡߊ߲߬ ߣߌ߫ ߘߋ߲߸ ߡߊ߲߰ ߞߘߐ ߦߋ߫ ߡߊ߬ߜߵߊ߲߬ ߘߌ߫߸ ߡߊ߲߬ߛߊ ߞߊ߬ߣߌ߲߫߸ ߘߋ߲ ߞߘߐ ߦߋ߫ ߡߏߦߌߝߋ߲ ߘߌ߫߸ ߥߟߊ߫ ߡߙߊ߬ߡߐ߮ ߟߎ߬ ߞߘߐ߫ ߡߊߛߐߘߐ߲ߝߍ߫ ߓߟߏ ߡߊ߬. ߞߊ߬ߓߌ߯ ߒ߬ ߓߐߛߎ߲ ߠߎ߬ ߟߊ߫ ߡߊ߬ߙߊ ߟߊߦߟߍ߬ߡߊ߲߬ ߕߎߡߊ ߞߋߕߊ ߟߎ߫ ߝߍ߬ ߞߵߊ߬ ߓߐ߫ ߞߊ߬ߡߙߊ ߟߎ߬ ߓߟߏ߫߸ ߡߊ߲߰ ߘߋ߲߬ ߞߏ ߟߊߦߍ߬ߟߍ ߘߊߡߌ߬ߘߊ߬ ߘߊ߫ ߡߙߊ߬ߡߐ߮ ߡߊߞߍ߫ ߦߙߐ ߡߊ߬ ߡߙߊ߬ߡߐ߮ ߖߍ߬ߘߍ ߝߍ߬ ߊ߰ ߝߐ߫ ߟߴߏ߬ ߡߍ߲ ߡߊ߬ ߞߏ߫ ߡߊ߲߰ߘߋ߲. ߡߊ߲߬ߘߋ߲߬ ߞߏ߬ ߞߎߡߊ ߏ߬ ߟߋ ߣߊ߬ߣߍ߲߬ ߟߊߦߟߍ߬ ߟߊ߫ ߛߏ߲߬ߖߘߊ߬ ߞߋߕߊ߬ ߟߊ߫ ߡߊ߲߬ߛߊ߬ߟߊ ߡߊ߬߸ ߊ߬ ߣߴߏ߬ ߞߣߍ ߥߙߊ߬ ߕߎߡߊ ߡߊ߲߬ߘߋ߲߬ ߛߏߡߐ߯ߦߊ ߛߋ߫ ߕߎߡߊ ߊ߬ ߤߏߞߌ ߘߐ߫ ߊ߬ ߣߘߐ߬ߛߌ߮ ߟߎ߬ ߓߟߏ߫߸ ߞߏ߬ߣߌ߲߬ ߡߊ߬ߖߌ߮ ߕߎ߬ߡߊ ߣߊ߬ ߘߊ߬ ߖߡߊ߬ߣߊ ߞߣߍ ߡߊߥߦߍߥߦߍ߫ ߝߎߚߎ߫ ߝߏ߫ ߞߊ߬ ߣߵߊ߬ ߕߏ߫ ߊ߬ ߕߊ߲ߓߊ߲ ߘߐߙߐ߲߫ ߡߊ߬. ߣߌ߲߬ ߠߋ߬ ߞߏߛߐ߲߬߸ ߡߊ߲߬ߘߋ߲߬ ߕߐ߮ ߦߋ߫ ߝߐ߫ ߟߊ߫ ߡߊ߲߬ߘߋ߲߫ ߞߘߐ߬ߡߊ߲ ߕߊ߲ߓߊ߲ ߠߋ߫ ߡߊ߬ ߤߊߟߌ߫ ߓߌ߬߸ ߓߡߊ߬ߞߐ߫ ߣߌ߫ ߛߌ߯ߙߌ߲߫ ߕߍ ߘߐ߫ ߖߌߣߍ߫ ߣߌ߫ ߡߊ߬ߟߌ ߕߍ߫߸ ߊ߰ ߝߐ߫ ߟߊ߫ ߡߌ߬ߙߌ߲߬ߘߌ ߏ߬ ߟߋ ߡߊ߬ ߤߊߟߌ߫ ߓߌ߬ ߝߣߊ߫ ߞߏ߫ ߡߊ߬ߣߌ߲߬ߞߊ߸ ߏ߬ ߦߋ߫ ߡߊ߲߬ߘߋ߲߬ߞߊ ߡߊߝߊ߬ߟߊ߲߬ߞߏ߬ߣߍ߲ ߠߋ߬ ߘߌ߫. ߒ߬ߓߊ߬ ߡߊ߬ߣߌ߲߬ߞߊ ߏ߬ ߟߋ ߦߋ߫ ߝߐ߫ ߟߊ߫ ߡߊ߲߬ߘߋ߲߬ ߖߡߊߣߊ ߕߊ߲ߓߊ߲ ߣߴߊ߬ ߥߙߏ߬ߘߎ߮ ߓߍ߯ ߡߊ߬ ߛߌߛߍ߲߬߸ ߞߵߊ߬ ߘߊߡߌ߬ߣߊ߬ ߤߡߊߣߊ߫ ߡߊ߬ ߞߊ߬ ߕߊ߯ ߛߋ߫ ߓߊߕߍ߫ ߟߎ߫ ߣߌ߫ ߥߊߛߏߟߏ߲߫ ߣߌ߫ ߕߐ߬ߙߐ߲߬ ߠߎ߬ ߣߌ߫ ߥߎߟߘߊ ߟߎ߬ ߓߍ߯ ߟߊ߫߸ ߏ߬ ߟߎ߬ ߡߍ߲ ߓߍ߯ ߦߋ߫ ߖߌߣߍ߫ ߛߊ߲ߘߐ ߘߐ߫ ߛߌߛߍ߲߬ ߥߟߊ߫ ߖߌߣߍ߫ ߡߊ߲߬ߘߋ߲߫. ߡߊ߲߬ߘߋ߲߬ ߞߊ߲ߓߏߟߏ߲ ߏ߬ ߟߋ ߥߊߣߍ߲߫ ߕߟߋ߬ߓߐ ߘߐ߫ ߊ߬ ߖߊ߬ߥߏ߬ ߞߍ߬ߟߊ ߟߎ߬ ߓߟߏ߫ ߝߏ߯ ߞߊ߬ ߘߏ߲߬ ߕߎ ߞߘߐ߫ ߞߊ߬ ߞߍ߫ ߖߎ߬ߟߊ߬ ߞߊ߲ ߘߌ߫߸ ߞߵߊ߬ ߝߐ߫ ߦߙߐ ߏ߬ ߟߎ߫ ߡߊ߬ ߛߊ߫ ߞߏ߫ ߖߎ߬ߟߊ߬ߘߎ߯߸ ߓߊߏߏ߬ ߊ߬ ߞߊ߲ߓߏߟߏ߲ߢߐ߲߮ ߝߊ߲߬ ߞߋߟߋ߲ ߡߍ߲ ߦߋ߫ ߖߌߣߍ߫ ߞߣߐ߫ ߤߊߟߌ߫ ߓߌ߬ ߏ߬ ߦߋ߫ ߡߊ߬ߣߌ߲߬ߞߊ߬ߞߊ߲߬ ߕߐ߮ ߞߘߐ߫ ߞߐ߬ߣߌ߲߬ߧߊ߫ ߟߎ߫ ߘߐ߫߸ ߊ߬ ߝߊ߲߬ ߞߋߟߋ߲ ߦߋ߫ ߖߎ߬ߟߊ߬ߞߊ߲߬ ߕߐ߮ ߞߘߐ߫ ߞߘߏߥߙߌ߫ ߖߡߊߣߊ ߘߐ߫ ߞߵߊ߬ ߘߊߡߌ߬ߣߊ߫ ߏ߬ߖߣߍ߫ ߞߊ߬ ߕߊ߯. ߊ߬ߟߋ߬ ߡߊ߬ߣߌ߲߬ߞߊ߬ ߞߊ߲ߓߏߟߏ߲ ߏ߬ ߟߋ ߥߊߣߍ߲߫ ߥߙߏ߬ߘߎ߮ ߘߐ߫ ߔߏ߲߯ ߝߏ߫ ߞߊ߬ ߛߋ߫ ߟߊߓߙߌߦߊ߫ ߣߌ߫ ߛߙߊ߬ߟߏ߲߬ ߠߎ߫ ߘߐ߫߸ ߞߏ߬ߣߌ߲߬ ߞߊ߬ ߓߍ߲߬ ߡߊ߲߬ߘߋ߲ ߠߊ߫ ߓߘߊ߫ ߟߊߘߌߦߊߢߍ ߡߊ߬ ߊ߬ ߣߌ߫ ߞߦߊ ߟߊߣߐ߰ߦߴߊ߬ߟߎ߬ ߟߊ߫ ߞߊ߲ ߘߐ߫߸ ߊ߬ߟߎ߬ ߦߋ߫ ߕߐ߯ ߛߌߦߊߡߊ߲߫ ߞߘߐ߫ ߦߙߐ ߏ߬ ߟߎ߬ ߘߐ߫ ߏ߬ ߟߋ ߘߐ߫ ߞߵߊ߬ ߘߊߡߌ߬ߘߊ߫ ߖߏ߬ߡߊ߫ ߖߍ߬ߘߍ ߡߊ߬ ߡߊ߲߬ߘߋ߲߫ ߓߊ߬ߘߊ ߘߐ߫߸ ߞߊ߬ ߕߐ߮ ߟߊߛߌߦߊߦߊ߫ ߞߊ߬ ߓߍ߲߬ ߕߌ߲߬ߞߎߘߎ߲ ߟߊߛߌߦߊߦߊ ߣߌ߫ ߞߊ߲ߓߏߟߏ߲ߙߋ߲ ߠߎ߬ ߘߊ߲߬ߝߘߊ߬ߓߐ߬ߣߍ߲ ߡߊ߬߸ ߞߊ߬ ߞߍ߫ ߢߌ߲߬ ߠߎ߬ ߓߍ߯ ߘߌ߫߸ ߞߊ߬ ߒ߬ ߕߐ߯ ߡߊ߲߬ߘߋ߲ ߣߌ߬ ߡߊ߲߬ߘߋ߲߬ߞߊ ߝߐ߫ ߢߊ ߞߍ߫ ߞߏ߫: ߡߊ߬ߣߋ߲߬ߞߊ߸ ߡߊ߬ߣߌ߲߬ߞߊ߸ ߡߊ߬ߣߌ߲߬ߧߊ߸ ߛߊ߲ߞߊߙߊ߲ߞߊ߸ ߡߊ߬ߣߋ߲߬ߞߊ߬ߡߏߙߌ߸ ߥߎߟߊߘߟߊߞߊ߸ ߞߎ߬ߙߊ߲߬ߞߐ߸ ߞߐ߬ߣߌ߬ߊ߬ߞߊ߸ ߕߐ߬ߙߐ߲߬ߞߊ߸ ߕߐߡߊߡߊߣߌ߲ߢߊ߸ ߞߵߊ߬ ߕߘߍ߬ ߊ߬ ߓߍ߯ ߦߋ߫ ߡߊ߲߬ߘߋ߲߬ߞߊ ߟߋ߬ ߘߌ߫ ߊ߬ߟߎ߬ ߞߍ ߘߐ߫ ߡߊ߲߬ߘߋ߲ ߘߌ߫. ߓߊߏ߬ ߡߊ߲߬ߘߋ߲ ߠߋ ߕߘߍ߬ ߝߐ߫ ߟߊ߫ ߡߌ߬ߙߌ߲߬ߘߌ ߡߊ߬߸ ߞߊ߬ ߡߊ߲߬ߘߋ߲߬ ߝߐ߫ ߖߡߊ߬ߣߊ ߡߊ߬߸ ߡߊ߲߬ߘߋ߲߬ ߞߙߎߝߓߊ ߥߊ߬ߦߊ ߟߋ߬ ߣߊ߬ ߕߌ߲߬ߞߎ߬ߘߎ߲߬ߞߊ߬ߦߊ ߞߘߐߛߊ߫ ߟߊ߫߸ ߞߵߊ߲ ߕߐ߮ ߟߊߛߌߦߊߦߊ߫ ߊ߲ ߖߍ߬ߘߍ ߡߊ߬ ߝߎ߫. ߡߊ߲߬ߘߋ߲߬ߞߊ߬ߞߊ߲ ߥߟߊ߫ ߡߊ߬ߣߌ߲߬ߞߊ߬ߞߊ߲ ߞߍ ߡߍ߲ ߞߍߣߍ߲߫ ߡߊ߲߬ߘߋ߲߫ ߡߊ߲߬ߛߊ ߟߎ߬ ߣߴߊ߬ߟߎ߫ ߡߊ߬ߡߐ߮ ߟߎ߬ ߟߊ߫ ߞߊ߲ ߘߌ߫ ߕߊ߲ߓߊ߲ ߘߐ߫߸ ߏ߬ ߟߋ ߣߊ߬ ߡߊ߲߬ߘߋ߲߬ߞߊ ߣߴߊ߬ ߝߐ߫ ߢߊ߫ ߡߊߛߎߘߎ߲ߧߊ ߟߎ߬ ߞߍ߫ ߟߴߊ߬ ߝߐߓߊ߮ ߟߎ߬ ߛߌߦߊ ߕߐ߮ ߘߌ߫ ߞߐ ߣߌ߲߬ ߠߊ߫߸ ߡߊ߬ߣߋ߲߬ߞߊ ߣߌ߫ ߡߊ߬ߣߌ߲߬ߞߊ ߞߊ߬ߣߌ߲߫߸ ߞߵߊ߬ ߕߘߍ߬ ߜߎ ߡߊ߲߬ߘߋ߲߬ ߡߌߙߌ߲ߘߌ ߓߍ߯ ߝߘߏ߬ߓߊ߬ߕߐ߮ ߟߋ߫ ߕߘߍ߬߸ ߤߊߟߌ߫ ߣߴߊ߬ ߕߘߍ߬ ߘߊ߫ ߞߏ߫ ߊ߬ ߡߍ߲ ߕߍ߫ ߡߊ߲߬ߛߊ ߞߊ߲ ߝߐ߫ ߟߊ߫. ߒ߬ߓߊ߬ ߡߊ߲߬ߘߋ߲߬ߞߊ߲ ߡߍ߲ ߦߋ߫ ߡߊ߲߬ߘߋ߲߬ ߞߘߐ߬ߓߊ ߡߌ߬ߙߌ߲߬ߘߌ ߝߘߏ߬ߓߊ߬ߞߊ߲ ߘߌ߫߸ ߏ߬ ߟߋ ߣߊ߬ߣߍ߲߬ ߞߍ߫ ߟߊ߫ ߡߊ߲߬ߘߋ߲߫ ߓߊ߬ߘߊ ߣߴߊ߬ ߥߙߏ߬ߘߎ߰ ߖߡߊߣߊ ߞߊ߲ߓߏߟߏ߲ ߘߎ߲߬ߘߎ߬ߡߊ߬ ߕߐ߮ ߘߌ߫ ߞߐ ߣߋߌ߲߬ ߠߊ߫߸ ߞߐߜߍ ߣߌ߲߬ ߞߙߍߞߙߍߣߍ߲߫ ߡߍ߲ ߢߊߞߎ߲ߓߊ ߟߎ߬ ߝߐ߫ ߞߊߡߊ߬.

ߓߡߊߣߊ߲߫ ߕߐ߮ ߓߐߖߎ ߟߎ߬

ߓߡߊߣߊ߲

ߓߡߊߣߊ߲߫ ߕߐ߮ ߓߐߖߎ ߟߎ߬

ߓߊߡߊߣߊ߲ ߖߡߊߣߊ: ߓߡߊߣߊ߲ߠߊ߫ ߦߋ߫ ߡߊ߲߬ߘߋ߲߬ ߞߣߍߓߊ ߞߐ߰ߘߎ߰ ߝߊ߲ ߠߋ߬ ߘߌ߫߸ ߡߍ߲ ߛߏ߯ߙߏߣߍ߲߫ ߕߘߍ߬ ߘߏ߬ ߣߌ߫ ߞߙߌ߫ ߣߌ߫ ߓߙߍ߬ߘߎ߯ ߟߎ߫ ߣߴߊ߬ߟߎ߬ ߟߊߡߌߣߌ߲ ߠߎ߬ ߟߊ߫߸ ߞߘߐ߫ ߦߙߌߞߊ߫ ߟߋ߬ ߊ߬ ߕߐ߮ ߣߌ߲߬ ߠߊ߫߸ ߡߍ߲ ߓߍ߯ ߦߴߊ߬ ߟߊ߫ ߡߊ߲߬ߘߋ߲߬ߞߊ߬ߦߊ ߝߐ߫ ߟߊ߫ ߢߊ ߘߏ߫ ߞߊ߲߬߸ ߝߏߢߊ ߏ߬ ߘߏ߫ ߟߎ߫ ߝߟߍ߫ ߣߌ߲߬: ߓߊ߲߬ ߡߊ߲߰ ߠߊ߫ ߡߍ߲ ߞߘߐߢߐ߲߮ ߦߋ߫ ߓߊ߲߬ ߡߊ߲߰ ߘߐ߫ ߘߌ߫. ߏ߬ ߞߘߐ ߟߋ߬ ߞߏ߫ ߡߍ߲ ߞߵߊ߬ ߓߊ߲߬ ߊ߬ ߕߌ߱ ߘߐ߫ ߏ߬ ߟߎ߬ ߓߘߊ߸ ߛߎߡߊߥߙߏ߫ ߞߘߐߓߊ ߓߋ߲ߓߊ߫ ߞߘߐ߫ ߥߙߏ߬ߓߊ߫ ߖߊ߬ߙߌ߬ߛߐ߰ ߟߊ߫ ߕߌ߲߬ߞߎߘߎ߲ ߞߊ߬ߣߌ߲߫߸ ߗߍ߬ߡߐ߰ߓߊ ߏ߬ ߡߍ߲ ߞߵߊ߬ ߓߊ߲߬ ߡߊ߲߬ߛߊ߫ ߛߊ߲ߘߐ߫ ߡߙߊߞߊ ߟߎ߬ ߟߊ߫ ߡߊ߬ߙߊ ߡߊ߬ ߥߊ߰ߘߎ߰ ߛߌ߬ߛߋ߬ ߡߊ߲ߛߊ ߟߎ߫ ߕߋ߬ߟߋ߸ ߣߴߊ߬ ߓߐ߲ߛߐ߲߫ ߛߎߡߊߥߙߏ߫ ߞߊ߲ߕߍ߫ ߣߊ߬ ߘߊ߫ ߡߎߙߎ߲ߕߌ߫ ߞߐ߲ߞߐ߲ ߞߍ߫ ߞߊ߬ ߡߙߊ߬ߡߐ߮ ߕߐ߱ ߟߎ߬ ߟߊߡߎߙߎ߲ߕߌ߫ ߡߙߊ߬ߞߊ߬ ߝߊ߲ߞߊ ߡߊ߬. ߤߊߟߌ߫ ߓߌ߬ ߓߊߡߊ߲߯ߠߊ߫ ߞߎߡߊߘߋ߲ ߏ߬ ߦߋ߫ ߟߊߞߊ߬ߟߌ߬ ߟߊ߫ ߡߊ߲߬ߘߋ߲߬ ߖߋߟߌ ߟߎ߬ ߣߌ߫ ߘߝߐ߬ߦߊ߬ߟߊ ߟߎ߬ ߓߟߏ߫ ߟߍߙߊ ߟߎ߬ ߞߣߐ߫߸ ߊ߬ ߣߌ߫ ߞߵߊ߬ߟߋ߬ ߖߊ߬ߙߌ߬ߛߐ߰ ߛߌ ߟߎ߬ ߝߏ߬ ߞߵߊ߬ߟߎ߬ ߘߐߓߏ߲߫߫ ߊ߬ߟߎ߫ ߡߐ߰ߞߍ߬ ߝߟߐ ߏ߬ ߟߊ߫ ߝߊߘߌ߲ߧߊ ߟߊ߫ ߡߖߊ߬ߡߎ߲߬ߠߌ߲߬ ߞߊ߲ ߘߐ߫ ߞߏ߫ ߌ ߓߊߡߊ߲߯ߠߊ߫߸ ߞߏ߫ ߌ߬ߦߏ߯ ߌ ߛߋ߫ ߘߴߌ ߓߊ߲߬ ߠߊ߫ ߌ ߡߊ߫ ߘߐ߫. ߊ߬ߟߎ߬ ߓߋ߲ߓߊ߫ ߥߙߏ߬ߓߊ߫ ߕߘߍ߬ ߏ߬ ߟߊߡߌ߬ߘߊ߬ ߞߊ߲ ߞߍ߫ ߟߊ߫ ߟߋ߬ ߞߏ߫ ߊ߬ ߘߏ߲߬ ߕߏ߫ ߘߴߊ߬ ߡߊ߬߸ ߊ߬ߟߎ ߦߴߊ߬ ߝߐ߫ ߟߴߏ߬ ߟߋ ߘߐ߫ ߓߌ߬ ߞߏ߫ ߒ߬ߓߊ߫߸ ߓߊߏ߬ ߊ߬ߟߎ߫ ߣߵߏ߬ ߞߍ߫ ߟߴߊ߬ߟߎ߬ ߟߊ߫ ߓߢߊ ߣߴߊ߬ߟߎ߬ ߟߊ߫ ߗߍ߬ߦߊ ߟߋ߫ ߡߊ߬. ߒ߬ߓߊ߬ ߓߡߊߣߊ߲߫ ߞߏ ߟߊߦߟߍ߬ ߘߊ߫ ߛߎߡߊߒߜ߭ߟߏ߫ ߓߊߓߏ߲ ߏ߬ ߟߊ߫ ߡߊ߬ߙߊ ߣߌ߬ߣߌ߬ ߦߙߐ ߟߎ߫ ߡߌ߬ߙߌ߲߬ߘߌ ߡߊ߬ ߏ߬ ߢߊ ߟߋ߬ ؟ߞߐ ߟߊ߫߸ ߞߵߊ߬ ߟߊߦߟߍ߬ ߊ߬ߟߎ߬ ߞߍߦߙߐ ߘߌ߲߬ߞߌߙߊ ߝߣߊ߫ ߡߊ߬ ߞߏ߫ ߓߡߊߠߊ߲ߠߊ߫߸ ߓߊ߲߬ ߡߊ߲߰ ߘߐ ߟߎ߬ ߓߘߊ ߞߊ߬ߣߌ߲߫߸ ߒ߬ߓߊ߬ ߞߎߡߊߘߋ߲ ߏ߬ ߟߋ ߣߊ߬ߣߍ߲߬ ߡߊߦߟߍ߬ߡߊ߲߬ ߠߊ߫ ߞߍߢߊ ߢߌ߲߬ ߠߎ߬ ߓߍ߯ ߘߌ߫ ߛߊ߫: ߓߊߡߊ߬ߣߊ߲߸ߓߡߊߣߊ߲߸ ߓߊ߲ߓߊ߬ߙߊ߲߸ ߓߊ߲ߓߊߙߊ߲߸ ߓߊ߲ߓߊ߬ߙߊ߲߸ ߓߊ߲ߓߊߙߊ߲߸ ߊ߬ ߘߏ߲߬ ߦߋ߫ ߛߋ߫ ߟߊ߫ ߞߍ߫ ߟߴߏ߬ ߓߍ߯ ߘߌ߫ ߞߊ߲߫ ߞߊ߲ߡߊߛߙߋߡߊ ߣߌ߫ ߞߊ߲ߓߏߟߏ߲ ߠߊ߫ ߘߡߊߦߟߍߡߊ߲ ߛߌߟߊ ߝߍ߬. ߊ߰ ߝߐ߫ ߟߊ߫ ߝߣߊ߫ ߞߏ߫ ߡߊ߲߬ߘߋ߲߫ ߞߘߐ߬ߡߊ߲ ߕߎ߬ߡߊ ߟߊ߫߸ ߏ߬ ߟߊ߫ ߣߐ߭ ߣߴߊ߬ ߟߊ߫ ߡߊ߬ߙߊ ߝߊ߲߬ߞߊ ߓߏ߲߬ߧߊ ߡߍ߲ ߞߍ߫ ߘߴߊ߬ ߟߊߡߌߣߌ߲ ߞߊ߲߬ ߞߊߕߙߍ߬ߕߍ߫ ߊ߬ ߥߙߏ߬ߘߎ߰ ߝߊ߲ ߡߊ߬߸ ߓߊߏ߬ ߞߏ߫ ߡߎ߬ߡߊ ߏ߬ ߡߙߊ߬ߟߌ߬ ߞߍ߬ߟߊ ߟߎ߬ ߞߵߊ߬ߟߎ߬ ߓߌ߲ߓߌ߲߫ ߦߋ߬ ߞߊ߲߬ ߠߋ߬ ߝߍ߲ߝߍߘߍ߲߫ ߞߏ߫: ߒ ߓߊ߯ ߊ߬ ߡߙߊ߬߸ ߞߏ߫ ߒ ߓߊ߯ ߡߊ߬ߙߊ߫ ߏ߬ ߟߋ ߞߍߣߍ߲߫ ߦߋ߲߬ ߡߌ߬ߙߌ߲߬ߘߌ ߕߐ߯ ߓߊߡߊ߬ߙߊ߲ ߘߌ߫߸ ߞߊ߬ ߣߊ߬ ߓߊߡߊߙߊ߲ߠߊ߫ ߞߍ߫ ߘߌ߲߬ߞߌߙߊ ߕߐ߮ ߘߌ߫߸ ߞߊ߲߫ ߞߊ߲ߡߊߛߙߋߡߊ ߣߌ߫ ߕߎ߬ߡߊ ߟߊߖߊ߲߬ߧߊ ߟߋ߬ ߣߊ߬ߣߍ߲߫ ߊ߬ ߝߐ߫ ߢߊ ߛߎ߮ ߓߍ߯ ߘߌ߫ ߞߊ߲ߓߏߟߏ߲ ߠߎ߬ ߘߐ߫ ߛߊ߫ ߦߏ߫ ߊ߲ ߕߊ߬ߡߌ߲߬ߣߍ߲߫ ߊ߬ ߘߐ߫ ߢߊ ߡߍ߲. ߓߊ߲߬߫ ߡߊ߫ ߟߊ߫߸ ߓߡߊߣߊ߲ߦߊ ߕߐ߮ ߘߍ߬ߡߍ߲߬ߘߌ ߓߊ߲߬ ߡߊ߫ ߟߊ߫ ߟߊ߫߸ ߞߘߐ߫ ߝߌ߬ߟߊ߫ ߟߴߏ߬ ߟߊ߫: ߡߊ߫ ߡߍ߲ ߞߘߐߢߐ߲߮ ߦߋ߫ ߓߊ߫ ߣߌ߫ ߣߊ߫ ߘߌ߫߸ ߦߏ߫ ߒߡߊ߫߸ ߏ߬ ߞߘߐ ߟߋ߬ ߞߏ߫ ߒ ߓߊ߫ ߥߟߊ߫ ߒ ߣߊ߫. - ߡߊ߫ ߡߍ߲ ߞߘߐ ߦߋ߫ߡߊߕߌ߮ ߣߌ߫ ߡߊߙߌ ߘߌ߫ ߥߟߊ߫ ߡߊ߰ߙߌ ߣߌ߫ ߊߟߊ߫ ߘߌ߫. ߒ߬ߓߊ߬ ߞߏ߫ ߝߕߊ߬ߦߊ ߘߊߡߌ߬ߘߊ ߡߍ߲ ߞߍ߫ ߘߊ߫ ߒ߬ ߓߐߛߎ߲ ߠߎ߫ ߝߍ߬߸ ߞߊ߬ ߕߏ߫ ߘߋ߲ ߠߎ߬ ߞߍ߫ ߟߊ߫ ߝߊ߭ ߟߎ߬ ߕߊ ߘߌ߫ ߞߵߏ߬ ߟߎ߬ ߛߌ ߣߴߊ߬ߟߎ߫ ߖߊ߬ߡߎ߲ ߓߕߊ߬߸ ߞߊ߬ ߡߊ ߟߎ߬ ߕߏ߫ ߦߋ߲߬ ߊ߬ߟߎ߫ ߕߘߍ߬ ߏ߬ ߟߎ߬ ߡߍ߲ ߠߎ߬ ߕߊ ߘߌ߫߸ ߊ߬ߟߎ߬ ߓߊ߫ ߣߴߊ߬ߟߎ߬ ߣߊ߫ ߟߎ߫ ߞߊ߬ߣߌ߲߫߸ ߞߏ߫ ߡߌ߬ߙߌ߲߬ߘߌ ߡߍ߲ ߠߎ߬ ߝߟߐ߫ ߞߵߊ߬ߟߎ߫ ߓߊ߲߬ ߊ߬ߟߎ߬ ߡߊ߫ ߘߐ߫ ߏ߬ ߘߐ߫ ߞߊ߬ ߦߟߍ߬ߡߊ߲߫ ߊ߬ߟߎ߫ ߝߊ߬ ߟߎ߫ ߝߍ߬ ߞߊ߬ ߞߍ߫ ߏ߬ ߟߎ߬ ߕߊ ߘߌ߫߸ ߞߏ߫ ߓߊ߲߫ ߡߊ߫ ߟߊ߫ ߞߏ ߝߐ߫ ߘߴߏ߬ ߟߎ߫ ߟߋ߬ ߡߊ߬߸ ߞߊ߬ ߣߊ߬ ߞߎߡߊ ߏ߬ ߟߊߓߊ߲ ߞߍ߫ ߓߡߊߣߊ߫ ߣߌ߫ ߓߡߊߣߊ߲߫ ߘߌ߫߸ ߞߊ߬ ߞߍ߫ ߊ߬ ߝߐߢߊ ߓߍ߯ ߘߌ߫ ߞߐ ߟߊ߫ ߞߊ߲ߓߏߟߏ߲ ߠߎ߬ ߓߟߏ߫. - ߡߐ߰ ߜߘߍ߫ ߟߎ߫ ߕߊ߫ ߝߐߟߌ ߘߐ߫߸ ߞߏ߫ ߡߌ߬ߙߌ߲߬ߘߌ ߡߍ߲ ߠߎ߬ ߡߊ߫ ߛߐ߲߬ ߊ߬ߟߎ߬ ߓߟߏߓߐ߫ ߟߊ߫ ߞߊ߬ߞߘߐ ߟߎ߬ ߘߐ߫ ߛߌ߬ߟߡߊ߬ߦߊ ߣߊ߬ ߛߊ߲߬ ߞߎߘߊ߸ ߣߊߟߌ߬ߡߎ߲߫ ߖߏ߭ ߟߎ߬ ߣߌ߫ ߓߏߟߌ ߟߎ߬ ߣߌ߫ ߘߎ߬ߘߊ ߟߎ߬ ߣߴߏ߬ ߢߐ߲߰ߘߐ ߟߎ߬ ߘߌ߫ ߛߏߡߦߊ߫ ߣߊߡߎ߲ ߞߣߐ߫߸ ߞߊ߬ ߕߏ߫ ߏ߬ ߞߊ߲߬ ߞߵߊ߬ߟߎ߫ ߓߊ߲߬ ߊߟߊ߫ ߘߐ߫ ߏ߬ ߡߍ߲ ߦߴߊ߬ߟߎ߬ ߡߊ߫ ߘߌ߫߸ ߞߵߌ ߛߐ߲߬ ߓߏߟߌ ߟߎ߬ ߘߐ߫߸ ߞߏ߫ ߊ߬ ߝߐߣߍ߲߫ ߡߌ߬ߙߌ߲߬ߘߌ ߏ߬ ߡߊ߬ ߏ߬ ߟߋ ߘߐ߫ ߞߏ߫ ߓߊ߲߬ ߡߊ߫ ߟߊ߸ ߡߍ߲ ߓߊ߲߬ߣߍ߲߬ ߊߟߊ߫ ߘߐ߫ ߞߵߏ ߞߎ߲߭ ߞߍ߫ ߊ߬ ߘߏ߲߬ߓߊߟߌߦߊ ߘߌ߫ ߛߌ߬ߟߡߊ߬ߦߊ ߘߐ߫߸ ߞߊ߬ ߕߏ߫ ߊ߬ߟߎ߬ ߟߊ߫ ߖߏ߬ߕߌ߰ߦߊ ߣߌ߫ ߓߏߟߌߕߌ߯ߦߊ ߣߌ߫ ߛߏߡߦߊ ߔߊߞߌߛߊ ߡߊ߬. ߒ߬ߓߊ߫ ߓߡߊߣߊ߲ߦߊ ߞߎߡߊ ߓߐߖߎ ߞߍ߫ ߘߴߊ߬ ߛߎ߯ ߺ ߎ ߺ ߛߎ߯ ߘߌ߫߸ ߊ߬ ߞߎߡߊ ߞߏ߬ߣߌ߲ ߓߎ߲ߓߎ߲ߣߍ߲߫ ߞߎߡߊߘߋ߲ ߡߍ߲ ߠߎ߫ ߡߊ߬߸ ߏ߬ ߟߎ߫ ߟߋ߬ ߣߌ߲߬: ߓߊ߲߬ ߡߊ߲߰ ߘߐ߫ ߥߟߊ߫ ߓߊ߲߬ ߡߊ߲߰ߘߐ߫߸ ߓߊ߲߬ ߡߊ߫ ߘߐ߫ ߥߟߊ߫ ߓߊ߲߬ ߡߊ߫ ߟߊ߫߸ ߒߓߊ߯ ߊ߬ ߡߙߊ߬߸ ߊ߬ ߕߎ߬ߢߊ ߞߍ߫ ߘߊ߫ ߝߋ߲ ߺ ߋ ߺ ߝߋ߲߫ ߘߌ߫ ߊ߬ ߞߏ߬ߣߌ߲ ߞߎߡߊߘߋ߲߫ ߡߎ߰ߡߍ ߦߋ߫ ߡߊ߲߬ߘߋ߲߫ ߝߘߏ߬ߓߊ߬ߞߊ߲ ߔߌߦߐߔߌߦߐ ߟߋ߬ ߘߌ߫߸ ߊ߬ ߡߌ߬ߙߌ߲߬ߘߌ ߓߍ߯ ߝߣߊ߫ ߘߏ߲߬ ߘߊ߫ ߟߋ߬ ߡߊ߲߰ ߠߊ߫ ߡߊ߬ߙߊ ߞߣߐ߫ ߡߊ߲߬ߘߋ߲߬ ߞߏ ߞߎ߲߬ߕߊ߮ ߞߘߐ߫߸ ߏ߬ ߟߋ ߣߵߊ߬ߟߎ߬ ߓߍ߯ ߞߍ߫ ߟߊ߫ ߡߊ߲߰ߘߋ߲ ߘߌ߫߸ ߓߊߏ߬ ߡߊ߲߬ ߕߘߍ߬ ߊ߬ߟߎ߫ ߡߙߊ߬ ߟߊ߫. ߝߣߊ߫߸ ߊ߰ ߡߐ߰ ߛߘߍߡߊ߲߫ ߞߎ߲߭ ߘߐ߫ ߟߋ߬߸ ߞߏ߫ ߓߙߊߡߊߒߜ߭ߟߏ߫ ߣߴߊ߬ ߘߐ߯ߞߍ߫ ߢߊ߬ߒߜ߭ߟߏ߫ ߓߐ߲ߛߐ߲ ߠߎ߬ ߟߊ߫ ߡߙߊ߬ ߖߡߊߣߊ ߟߎ߫ ߟߋ߬ ߓߡߊߣߊ߲ߠߊ߫ ߘߌ߫߸ ߞߴߏ߬ ߟߎ߫ ߟߋ߬ ߝߣߊ߫ ߦߋ߫ ߓߡߊߣߊ߲ ߘߌ߫߸ ߏ߬ ߘߏ߲߬ ߦߋ߫ ߞߐߟߊ߫ ߞߏ߫ ߟߋ߬ ߘߌ߫ ߡߊ߲߬ߘߋ߲߬ߦߊ ߘߊߝߍ߬߸ ߓߊ ߡߊ߬ߙߊ ߏ߬ ߘߊߡߌߘߊ ߞߍ߫ ߘߊ߫ ߞߘߐ߬ߡߊ߬ߡߐ߮ ߘߋ߲ߞߍ߫ ߞߊߟߊ߲ߖߊ߲߫ ߞߎ߬ߟߎߓߊ߬ߟߌ߬ ߟߊ߫ ߝߊ߲߬ߞߊ߬ ߕߊ ߟߋ߬ ߘߌ߫ ߡߊ߲߬ߘߋ߲߬ ߡߊ߲ߛߊ ߟߎ߬ ߟߊ߫ ߡߊ߬ߖߌ߮ ߕߎ߬ߡߊ߸ ߊ߬ߟߎ߫ ߞߊ߬ߢߊ ߡߍ߲ ߞߍ߫ ߘߊ߫ ߞߎ߲߬ߠߊ߬ߛߌ߮ ߟߊߕߊ߯ ߟߊ߫ ߘߏ߬ ߖߡߊ߬ߣߊ ߘߐ߫. ߓߊߘߋ߲ߡߊ߫ ߝߌ߬ߟߊ ߏ߬ ߟߎ߬ ߟߊ߫ ߡߊ߬ߙߊ ߣߌ߬ߣߌ߬ ߦߙߐ ߟߎ߬ ߦߋ߫ ߘߏ߬ ߣߌ߫ ߞߙߌ߫ ߣߌ߫ ߓߙߍ߬ߘߎ߯ ߡߍ߲ ߠߎ߬ ߘߌ߫߸ ߤߊߟߌ߫ ߓߌ߬ ߏ߬ ߟߎ߬ ߦߋ߫ ߓߡߊߣߊ߲߫ ߖߡߊߣߊ ߕߊ߲ߓߊ߲ߦߊ ߟߊ߫߸ ߏ߬ ߟߎ߫ ߟߋ߬ ߓߍ߯ ߣߊ߬ߣߍ߲߫ ߟߊߞߎ߲߫ ߠߊ߫ ߖߡߊ߬ߣߊ߬ ߞߋߟߋ߲߫ ߞߣߐ߫ ߞߐ ߣߌ߲߬ ߠߊ߫ ߞߵߏ ߝߙߊ߬ ߓߡߊߣߊ߲ߦߊ ߤߏߞߌ ߟߊ߫ ߦߙߐ߫ ߡߊߜߐ߬ߙߐ߲߬ߞߕߐ߬ߣߍ߲ ߠߎ߫ ߞߊ߲߬ ߡߊ߲߬ߘߋ߲߫ ߡߊ߲߬ߛߊ߬ߟߊ ߕߏ߲ߓߏ߲ ߘߐ߫ ߞߏ߫ ߡߊߟߌ߫߸ ߡߊ߲߬ߘߋ߲߬ ߕߐ߯ ߘߐߕߌߢߍߣߍ߲ ߞߊ߬ߣߌ߲߫. ߊ߬ ߓߌ߬ ߝߐߟߌ߫ ߘߐ߫߸ ߒߞߏ ߞߊ߲ߓߏ߲ߓߊ߫ ߣߊ߯ߣߌ߲ ߞߋߟߋ߲߫ ߠߋ߬ ߓߡߊߣߊ߲ߞߊ߲ ߘߌ߫߸ ߊ߬ ߘߏ߲߬ ߝߐߓߊ߮ ߦߋ߫ ߞߊ߲ߓߏߟߏ߲ ߕߐ߬ ߛߊ߬ߓߊ ߓߍ߯ ߓߛߌ߬ߞߌ߬ ߟߊ߫ ߓߡߊߣߊ߲ߞߊ߲ ߝߐߓߊ߮ ߟߋ߬ ߘߌ߫ ߊ߬ ߕߊ߫ ߢߊ߫ ߞߊ߲߬.

ߖߎߟߊߘߎ߮

ߖߎ߬ߟߊ

ߖߎߟߊߘߎ߮

ߖߎ߬ߟߊ߬ߘߎ߯: ߡߊ߲߬ߘߋ߲߫ ߞߘߐ߬ߡߊ߲ ߖߡߊ߬ߣߊ߬ߓߊ ߛߌ߰ߢߊ ߘߐ߫ ߞߊ߬ߓߌ߯ ߛߏ߲߬ߖߘߊ߬ ߕߟߋ ߟߊ߫߸ ߗߋߘߊ ߓߍ߯ ߘߐߕߟߊߣߍ߲߫ ߠߋ߫ ߕߘߍ߬ ߡߌ߬ߙߌ߲߬ߘߌ ߝߣߍ߬ߝߣߍ ߓߍ߯ ߕߍ߫ ߞߊ߬ ߓߍ߲߬ ߘߍ߭ ߢߐ߲߯ ߘߝߊ ߡߙߌߦߊ ߡߊ߬߸ ߞߊ߬ ߓߊ߯ߙߊ߫ ߞߟߊ߬ߟߊ߬ߡߊ ߓߍ߯ ߞߊ߬ߙߌ߬ߝߴߊ߬ ߕߊ߫ ߓߏ߲ߞߣߐ߫ ߟߊ߫ ߏ߬ ߘߐ߫߸ ߓߍ߯ ߦߴߊ߬ ߡߊ߬ߞߍߕߊ ߟߐ߲߫ ߡߌ߬ߙߌ߲߬ߘߌ ߡߊ߬ߝߊ߲ ߝߍ߬߸ ߞߊ߬ ߞߍߒߢߍߕߊ ߝߣߊ߫ ߟߐ߲߫߸ ߞߊ߬ ߛߌ߰ߢߐ߲߰ߦߊ ߜߋ߲߬ߞߘߎ߬ߢߐ߲߰ߠߊ ߘߐߘߌߦߊ߫ ߓߍ߯ ߢߊ߬ߕߣߐ ߝߊ߬ߟߋ߲ ߘߐ߫ ߘߏ ߕߊ ߟߊ߫. ߊ߬ߟߎ߫ ߞߊ߬ ߡߌ߬ߙߌ߲߬ߘߌ ߞߍ߫ ߛߙߊ߫ ߝߌ߬ߟߊ߫ ߟߋ߬ ߘߌ߫ ߏ߬ ߘߐ߫ ߡߎߣߎ߲߬߸ ߕߏ߲ߕߌ߮ ߣߌ߫ ߕߏ߲ߒߕߊ߲߸ ߞߊ߬ ߕߏ߲ߕߌ߮ ߟߎ߬ ߕߟߊ߫ ߡߊ߲߬ߛߊ߬ߛߌ ߟߎ߬ ߣߌ߫ ߣߊ߲߬ߕߌ߮ ߟߎ߬ ߘߌ߫߸ ߞߊ߬ ߕߏ߲ߒߕߊ߲ ߠߎ߬ ߕߟߊ߫ ߢߡߊ߬ߞߟߊ ߟߎ߬ ߣߌ߫ ߡߏߙߌ ߟߎ߬ ߣߌ߫ ߘߏ߫ ߜߘߍ߫ ߟߎ߫ ߘߌ߫. ߕߟߊߟߌ߫ ߓߏߟߏ߲ ߢߌ߲߬ ߠߎ߬ ߟߊߥߟߌ߬ߣߍ߲߫ ߓߊ߯ߙߊ߫ ߞߍߕߊ ߘߊ߲߬ߠߊߕߍ߭ ߟߋ߫ ߡߊ߬߸ ߓߍ߯ ߦߋ߫ ߘߊ߲߬ ߊ߬ ߗߋߘߊ ߕߊ߲ߛߊ߲ ߘߊ߲߬ ߦߙߐ߸ ߘߏ߫ ߞߊߣߊ߬ ߘߏ߲߬ ߘߏ߫ ߟߊ߫ ߓߊ߯ߙߊ ߕߌ߲ߕߊ߲ ߞߣߐ߫. ߒ߬ߓߊ߬ ߡߌ߬ߙߌ߲߬ߘߌ ߡߊ߬ߙߊ ߣߴߊ߬ ߡߊߞߊ߲ߞߊ߲ ߣߴߊ߬ ߟߓߊߟߏ ߞߊ߬ߙߌ߬ߝߊ߬ߣߍ߲߫ ߡߊ߲߬ߛߊ߬ߛߌ ߟߎ߬ ߣߌ߫ ߕߏ߲ߕߌ߮ ߟߎ߬ ߟߊ߫ ߢߊ ߡߍ߲ ߞߊ߬ ߓߟߏ߫ ߟߊߓߊ߯ߙߊ ߣߌ߫ ߢߟߊߞߌߦߊ߫ ߞߏ ߟߎ߬ ߣߌ߫ ߡߌ߬ߙߌ߲߬ߘߌ ߢߊ߰ߘߐ߬ߘߌ߬ߦߊ߬ ߞߏ ߟߎ߬ ߣߌ߫ ߕߍߝߐ ߣߌ߫ ߞߟߍ߬ߓߊ߲ ߠߎ߬ ߣߌ߫ ߘߐ߬ߝߐ ߕߊ߲߬ߞߊߞߊ߬ߙߌ߬ߝߊ߫ ߢߡߊ߬ߞߟߊ ߟߎ߬ ߟߊ߫߸ ߞߊ߬ ߣߊߡߎ߲߫ ߞߏ ߘߊ߬ߙߌ߬ߣߊ߲߬ߞߏ ߟߎ߬ ߣߊߡߎ߲߫ ߠߊߘߋߦߌ߲ ߠߴߊ߬ߟߎ߬ ߟߥߊߟߌ ߞߊ߬ߙߌ߬ߝߊ߫ ߡߏߙߌ ߟߎ߬ ߟߊ߫ ߛߌ߬ߟߡߊ߬ߦߊ߬ ߞߎ߲ߠߊ߫߸ ߊ߬ ߣߌ߫ ߛߏߡߊ ߟߎ߬ ߟߊ߫ ߞߊ߬ߞߘߐ߬ ߞߎ߲ߠߊ߫. ߖߊ߬ߥߏ ߣߌ߫ ߝߋ߬ߙߋߛߊ߲߬ߠߌ߲ ߣߌ߫ ߟߊ߬ߝߏߦߌ ߣߌ߫ ߟߊ߬ߛߣߍ ߣߌ߫ ߛߐ߬ߘߐ߲ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߏߢߊ ߟߎ߬ ߞߊ߬ߙߌ߬ߝߊ߬ߣߍ߲߫ ߝߣߍ߬ߝߣߍ ߘߏ߫ ߟߎ߫ ߟߊ߫ ߏ߬ ߟߋ ߘߐ߫ ߡߊ߲߬ߘߋ߲߬ ߖߡߊߣߊ ߞߣߐ߫߸ ߝߏߝߣߊ ߟߎ߬ ߦߋ߫ ߡߍ߲ ߞߐ ߘߌ߫߸ ߦߏ߫ ߞߎߦߊߕߍ ߟߎ߬ ߦߋ߫ ߢߡߊ߬ߞߟߊ߬ߦߊ ߞߐ ߘߌ߫ ߢߊ ߡߍ߲߸ ߊ߬ ߣߌ߫ ߞߋߕߊ ߟߎ߬ ߦߋ߫ ߡߊ߲߬ߛߊ߬ߛߌ߬ߦߊ ߞߐ ߘߌ߫ ߢߊ ߡߍ߲. ߒ߬ߓߊ߬ ߕߏߒߕߊ߲ߧߊ ߕߌ߲ߕߊ߲ ߞߣߐ߫߸ ߖߊ߬ߥߏ ߞߊ߬ߙߌ߬ߝߊ߬ߣߍ߲߫ ߕߘߍ߬ ߓߏ߲ߞߣߐ ߡߍ߲ ߠߎ߬ ߟߊ߫ ߏ߬ ߟߎ߬ ߗߋߘߊ ߏ߬ ߟߋ ߣߘߊ߬ ߞߍ߫ ߓߊ߯ߙߊ߫ ߢߊ߬ߕߣߐ߬ߡߊ߬ߓߊ߫ ߣߌ߫ ߡߊ߲߬ߘߌ߬ߡߊ߲߬ߓߊ߫ ߘߌ߫߸ ߡߍ߲ ߕߐ߬ߣߐ ߦߋ߫ ߡߌ߬ߙߌ߲߬ߘߌ ߝߣߍ߬ߝߣߍ ߓߍ߯ ߞߊ߲߬ ߜߍ ߘߐ߫߸ ߓߊߏ߬ ߊ߬ߟߎ ߟߋ߫ ߕߘߍ߬ ߣߊ߬ ߛߌ߰ߢߐ߲߰ ߡߌߙߌ߲ߘߌ ߟߎ߬ ߟߊ߫ ߛߏߡߐ߯ߦߊߝߋ߲ ߠߎ߬ ߘߌ߫ ߡߊ߲߬ߘߋ߲߫ ߞߣߐ߫߸ ߥߟߊ߫ ߡߊ߲߬ߘߋ߲ ߡߊ߬ߞߏ߬ ߡߊ߬ ߝߋ߲ ߠߎ߬ ߕߎ߲ߞߊ߲ ߠߊ߫߸ ߞߊ߬ ߡߊ߲߬ߘߋ߲߬ ߛߏߡߐ߯ߦߊ߫ ߝߋ߲ ߣߴߊ߬ ߡߐ߰ߣߍ߲߬ߝߌ߲߬ߧߊ ߘߐߘߌߦߊ߫ ߝߋ߲ ߠߎ߬ ߝߣߊ߫ ߕߊ߬ ߞߵߊ߬ ߟߊߛߋ߫ ߥߊߟߌ ߟߎ߫ ߡߊ߬ ߕߎ߲ߞߊ߲ ߠߎ߬ ߟߊ߫. ߞߏ߬ߣߌ߲߬ ߥߊߦߌߞߊ߫߸ ߞߍ߬ߟߍ ߣߌ߫ ߖߊ߯ߓߊߕߐߦߊ ߓߊ߯ ߡߊ߰ ߡߌ߬ߙߌ߲߬ߘߌ ߟߊ߫ ߞߏߕߊ߲߫߸ ߝߐߛߐ߲ ߘߌ߫ ߘߏ߲߬ ߗߋߘߊ ߕߌ߰ ߟߊ߬ ߡߐ߮ ߟߎ߫ ߘߍ߲߬ߞߍ߲߬ߕߎ߲߰ ߢߊ ߘߐ߫ ߣߍ߲ߞߍ߫ ߥߟߊ߫ ߓߊߞߍ߫߸ ߞߊ߬ ߘߏ߫ ߟߎ߫ ߟߐ߬ ߘߏ߫ ߟߎ߫ ߟߊ߫ ߓߊ߯ߙߊ߫ ߞߍ߫ ߟߊ߫ ߞߊ߬ ߓߍ߲߬ ߊ߬ ߞߍߓߊ߯ ߓߘߍ ߟߎ߬ ߟߊߝߐߦߊ ߡߊ߬߸ ߥߟߴߊ߬ ߟߊ߫ ߕߜߋߦߊ ߡߊ߬ ߡߍ߲ ߕߴߛߋ߫ ߘߍ߬ ߞߎߘߊ ߏ߬ ߡߊ߬ߞߏ ߟߎ߬ ߘߓߐ߫ ߟߊ߫߸ ߛߊ߫ ߗߋߘߊ ߏ߬ ߕߌ߱ ߟߎ߫ ߥߟߍ߬ߦߊ ߘߌ߫ ߓߊ߲߫ ߞߊ߬ ߢߐ߲߯ ߘߝߊ ߕߏ߫ ߊ߬ ߡߊ߬ ߡߌ߬ߙߌ߲߬ߘߌ ߞߣߐ߫. ߒ߬ߓߊ߬ ߗߏ߯ߦߊ ߣߌ߲߬ ߝߙߊ߬ߣߍ߲ ߗߋߘߊ ߘߌߦߊ ߣߴߊ߬ ߞߊ߬ߣߌ߲ ߞߊ߲߬ ߡߊ߲߬ߘߋ߲ ߕߐ߬ߡߊ ߟߎ߬ ߓߟߏ߫߸ ߏ߬ ߟߋ ߣߊ߬ ߛߌ ߛߎ߯ߦߊ ߓߍ߯ ߘߏ߫ ߛߐ߬ߘߐ߲߬ ߠߊ߫ ߗߋߘߊ ߟߎ߬ ߞߍߟߌ ߘߐ߫ ߞߐ ߢߌ߲߬ ߠߊ߫߸ ߌ ߦߋ߫ ߞߋߕߊ߫ ߖߋߟߌ ߣߌ߫ ߘߎ߲ߓߎߦߊ߫ ߡߏߙߌ ߦߋ߫ ߟߴߏ߬ ߟߋ ߘߐ߫ ߣߌ߲߬ ߓߌ߬߸ ߊ߬ ߣߌ߫ ߞߊ߬ߡߙߊ߬ ߞߊߥߎߟߐ߸ ߞߊ߬ ߛߙߋ߬ߝߎ ߘߏ߫ ߟߎ߫ ߛߏߡߊߟߡߊ ߝߣߊ߫ ߦߋ߫. ߣߌ߲߬ ߓߍ߯ ߟߋ߬ ߞߏߛߐ߲߬߸ ߡߊ߲߬ߘߊ߲߬ߞߊ ߡߍ߲ ߠߎ߬ ߕߊ߯ ߘߊ߫ ߖߡߊ߬ߣߊ ߕߟߋ߬ߓߐ߬ߜߍ ߘߐ߫߸ ߏ߬ ߝߊ߲߬ߓߊ ߡߊߟߐ߲ ߡߍ߲ ߞߍ߫ ߘߊ߫ ߖߊ߬ߥߏ ߟߊ߫ ߞߊ߬ߦߌ߯ ߊ߬ ߞߎ߲߬ߝߟߐ ߟߎ߬ ߛߋ߫ ߕߎߡߊ ߟߊ߫߸ ߏ߬ ߟߋ ߣߵߊ߬ ߞߍ߫ ߟߊ߫ ߏ߬ ߟߎ߬ ߗߋߘߊ ߏ߬ ߟߊߦߟߍ߬ ߘߴߊ߬ߟߎ߫ ߞߎ߲߬ ߞߏ߫ ߖߊ߬ߥߏ߬ ߞߍ߬ߟߊ ߟߎ߬ ߟߋ߬ ߥߟߊ߫ ߖߊ߬ߥߏ߬ߟߊ ߟߎ߬ ߤߊߡߊ߲ߕߍ߫ ߖߎ߬ߟߊ ߟߊ߬ߛߎ߬ߘߎ߲߬ߧߊ߬ ߓߟߏ ߡߊ߬߸ ߞߣߊ߬ ߏ߬ ߟߊߓߊ߲ ߞߍ߫ ߡߊ߲߬ߘߋ߲߬ ߡߌߙߌ߲ߘߌ ߏ߬ ߛߌߦߊ ߕߐ߮ ߘߌ߫ ߞߏ߫ ߖߎ߬ߟߊ߸ ߞߵߊ߬ߟߎ߬ ߡߊߞߍ߫ ߦߙߐ ߕߐ߮ ߞߍ߫ ߖߎ߬ߟߊ߬ߘߎ߯ ߘߌ߫ ߞߵߊ߬ߟߎ߬ ߕߐ߮ ߣߴߊ߬ߟߎ߫ ߘߌ߲߬ߞߌߙߊ ߝߐ߫ ߢߊ߫ ߞߎߘߊ ߏ߬ ߞߍ߫ ߊ߬ߟߎ߬ ߡߊߦߋߙߋ߲ߟߊ߲ ߘߌ߫ ߡߊ߲߬ߘߋ߲ ߕߐ߬ߡߊ ߟߎ߬ ߕߍߡߊ߬߸ ߞߵߊ߬ ߕߘߍ߬ ߜߎ ߖߎ߬ߟߊ ߕߴߊ߬ ߕߊ߫ ߛߌߦߊ߫ ߓߟߏߡߊߞߊ߬ߣߍ߲߫ ߘߌ߫ ߡߎ߰ߡߍ߫. ߊ߬ߟߎ߬ ߛߌߦߊ ߟߐ߲ ߠߋ߬ ߞߏߛߐ߲߬߸ ߡߊ߲߬ߘߋ߲߬ߞߊ ߟߋ߬ ߛߓߍ߫ ߟߴߊ߬ߟߎ߬ ߟߊ߫ ߞߎ߲߬ߠߊ߬ߛߌ߮ ߓߟߏ߫ ߛߓߍ߫ ߞߟߊ߬ߟߊ߬ߡߊ ߟߎ߬ ߘߐ߫ ߤߊߟߌ߫ ߓߌ߬߸ ߞߏ߫ ߡߊߟߋ߲ߞߋ ߥߟߊ߫ ߡߊߟߌ߲ߞߋ߸ ߝߐߢߊ ߏ߬ ߡߍ߲ ߡߌ߬ߘߊ߬ߣߍ߲߫ ߊ߬ߟߎ߫ ߝߘߏ߬ߓߊ߬ߖߎ߯ ߡߊ߬ߜߐ߬ߙߐ߲߬ߞߕߐ߬ߟߌ߬ߟߊ ߡߊ߬ ߏ߬ ߡߍ߲ ߕߴߛߋ߫ ߝߟߌ߬ ߟߴߊ߬ߟߎ߫ ߡߊ߬ ߊ߬ߟߎ߬ ߟߊ߫ ߓߘߍ߬ߓߘߍ߬ߟߌ߬ ߖߎ߮ ߟߓߊߟߏ ߘߐ߫߸ ߞߏ߫ ߡߊ߲߬ߘߋ߲߬ߞߊ ߟߎ߫ ߟߋ߬ ߞߵߊ߬ ߛߓߍ߫ ߞߏ߫ ߡߊߟߋ߲ߞߋ߸ ߞߵߊ߬ ߕߘߍ߬ ߜߎ ߊ߬ߟߎ߬ ߦߴߊ߬ߟߎ߬ ߓߘߊ ߟߎ߫ ߟߋ߬ ߘߐ߫ ߛߎߋ߫ ߸ ߡߊ߲߬ߘߋ߲߫ ߝߊ߲߭ ߘߏ߫ ߘߐ߫ ߞߊ߬ߣߌ߲߫߸ ߒ߬ߓߊ߬ ߖߎ߬ߟߊ߬ ߞߏ ߦߋ߫ ߘߊߞߎ߲ ߢߌ߲߬ ߠߋ߬ ߘߐ߫.

ߡߊ߲߬ߘߋ߲߬ߞߏ

ߡߊ߲߬ߘߋ߲߬ߞߏ

ߡߊ߲߬ߘߋ߲߬ߞߏ

ߞߊ߬ߛߏ߲߬: ߞߣߍ ߓߍ߯ ߣߴߊ߬ ߕߐ߯ ߟߋ߬ ߊ߬ ߦߋ߫ ߞߟߌ߫ ߟߊ߫ ߡߍ߲ ߠߊ߫߸ ߏ߬ ߓߟߏ ߡߊ߬߸ ߊ߬ ߝߐ ߘߊߡߌ߬ߘߊ߬ ߘߊ߫ ߡߊ߲߬ߘߋ߲߫ ߕߟߋ߬ߓߋ߬ ߞߣߍ ߡߊ߬ ߞߊ߬ߦߌ߯ ߕߎ߬ߡߊ߬ ߖߊ߲߫ ߞߏ߫ [ߞߊ߬ߛߏ߲߬]،߸ ߊ߬ ߓߌ߬ ߝߐߟߌ߫ ߘߐ߫ ߏ߬ ߦߋ߫ ߘߊߡߌ߬ߘߊ߬ ߟߊ߫ ߡߊߟߌ߫ ߕߟߋ߬ߓߋ ߟߋ߬ ߘߐ߫ ߞߊ߬ ߕߊ߯ ߞߐ߰ߖߌ߬ߘߊ ߟߊ߫. ߞߊ߬ߓߌ߯ ߞߊ߲ߓߏߟߏ߲ ߞߍ ߘߊߡߌ߬ߘߊ߬ ߘߊ߫ ߊ߬ ߝߐߝߐߓߊ߮ ߡߊߦߋߙߋ߲߫ ߝߋ߲ ߘߌ߫ ߞߵߊ߬ ߣߴߊ߬ ߞߊ߲߫ ߞߋߟߋ߲߫ ߝߐ߫ ߢߐ߲߮ ߠߎ߬ ߓߐ߫ ߢߐ߲߮ ߡߊ߬ ߞߊ߲ߓߏߟߏ߲ ߖߍ߬ߘߍ ߕߊ߫ ߝߐ߫ ߢߊ ߡߊ߬߸ ߏ߬ ߟߋ ߣߊ߬ ߞߊ߬ߛߏ߲߫ ߡߌ߬ߙߌ߲߬ߘߌ ߕߐ߮ ߞߍ߫ ߟߊ߫ [ߡߊ߲߬ߘߋ߲߬ߞߏ] ߘߌ߫߸ ߓߊ ߦߋ߲߬ߞߊ ߟߎ߬ ߦߋ߫ ߛߓߍߘߋ߲ [ߏ] ߟߋ߬ ߓߌ߬ߟߊ߬ ߟߴߊ߬ߟߎ߬ ߟߊ߫ ߞߎߡߊߘߋ߲ ߝߊ߲߬ߓߊ ߟߊߓߊ߲ ߠߊ߫߸ ߏ߬ ߟߋ ߣߊ߬ ߡߊ߲߬ߘߋ߲߬ߞߊ ߝߐ߫ ߢߊ ߞߍ߫ ߟߊ߫ ߡߊ߲߬ߘߋ߲߬ߞߏ ߘߌ߫߸ ߞߵߊ߬ ߕߘߍ߬ ߏ߬ ߝߌ߬ߟߊ ߓߍ߯ ߦߋ߫ ߞߎߡߊ߫ ߞߋߟߋ߲߫. ߞߊ߲ߓߏߟߏ߲ ߖߍ߬ߘߍ ߟߊ߫ ߖߘߍ߬ ߕߐ߯ߟߊ ߏ߬ ߟߋ ߣߊ߬ ߕߐ߮ ߟߊߛߌߦߊߦߊ߫ ߟߊ߫ ߞߊ߬ ߡߊ߲߬ߘߋ߲߬ߞߊ߬ ߞߋߟߋ߲ ߏ߬ ߞߍ߫ ߡߊ߬ߣߋ߲߬ߞߊ ߣߌ߫ ߡߊ߬ߣߌ߲߬ߞߊ ߣߌ߫ ߡߊ߬ߣߌ߲߬ߢߊ ߓߍ߯ ߘߌ߫߸ ߞߊ߬ ߖߎ߬ߟߊ ߝߣߊ߫ ߞߍ߫ ߖߎ߬ߙߊ ߘߌ߫ ߖߎ߬ߟߊ߬ߘߎ߯ ߕߌ߲߬ߞߌߘߎ߲ ߠߎ߬ ߘߐ߫. ߞߊ߬ߓߌ߯ ߡߊ߲߬ߘߋ߲߬ߞߊ ߞߍ߫ ߘߊ߫ ߡߊ߲߬ߘߋ߲߬ߞߏ ߘߌ߫߸ ߡߊ߲߬ߘߋ߲߬ߞߊ߬ߞߊ߲ ߝߣߊ߫ ߞߍ߫ ߘߊ߫ ߡߊ߲߬ߘߋ߲߬ߞߏ߬ߞߊ߲ ߘߌ߫߸ ߣߴߊ߬ ߞߍߢߊ ߣߌ߬ ߕߍ߫߸ ߖߡߊ߫ߣߊ ߏ߬ ߕߘߍ߬ ߦߋ߫ ߞߙߎ߬ߞߊ߲߬ߠߊ ߣߌ߫ ߓߙߍ߬ߘߎ߯ ߘߊ߲߬ߕߍ ߟߎ߫ ߟߋ߬ ߘߌ߫߸ ߞߊ߬ ߕߊ߯ ߊ߬ ߓߌ߬ߟߊ߫ ߖߏ߬ߟߊ߬ߘߎ߯ ߟߎ߫ ߟߊ߫ ߞߊ߬ߓߌ߯ ߡߊ߲߬ߘߋ߲߫ ߞߟߍ߬ߓߏߟߏ߲ ߟߊߕߊ߯ ߕߎߡߊ ߦߙߐ ߏ߬ ߟߎ߬ ߘߐ߫ ߛߏ߲߬ߖߘߊ߫ ߓߟߏ߫߸ ߝߊ߬ߞߏߟߌ߫ ߞߎ߲߬ߓߊ߫ ߣߌ߫ ߝߊ߬ߞߏߟߌ߫ ߘߓߊ߫ ߞߊ߬ ߡߍ߲ ߢߍߡߌ߬ߘߊ߬ ߡߊ߲߬ߘߋ߲߬ ߠߊ߫ ߞߐ߰ߖߌ߬ ߢߌ߬ߣߌ߲߬ ߞߊߡߊ߬. ߤߊߟߌ߫ ߓߌ߬ ߘߏ߲߬߸ ߡߊ߲߬ߘߋ߲߬ߞߏ ߏ߬ ߟߎ߬ ߟߊߣߍ߲ߓߊ ߟߋ߬ ߊ߬ߟߎ߬ ߟߊ߫ ߡߊ߲߬ߘߋ߲߬ߞߊ߬ߦߊ ߟߊ߫߸ ߊ߬ߟߎ߫ ߖߍ߬ߘߍ ߦߴߊ߬ ߝߐ߫ ߢߊ ߞߍ߫ ߟߊ߬ ߡߊ߲߬ߘߌ߲߬ߞߏ ߓߍ߯ ߘߌ߫߸ ߓߊߏ߬ ߊ߬ߟߎ߬ ߦߋ߫ ߘߋ߲ ߞߍ߫ ߟߊ߫ ߘߌ߲ ߠߋ߬ ߘߌ߫ ߞߍ߬ߣߍ߲߸ ߞߵߊ߬ ߝߐ߫ ߘߋ߲ߣߍ߲ ߡߊ߬ ߞߏ߫ ߘߌ߲ߘߌ߲ߏ߸ ߣߴߏ߬ ߕߍ߫ ߝߋߎ߫ ߡߊ߲߬ߘߋ߲߬ ߞߏ ߕߍ߫ ߊ߬ ߕߊ߫ ߛߌߦߊ߫ ߘߌ߫ ߊ߬ ߕߴߊ߬ ߕߊ߫ ߛߌߦߊ߫ ߕߐ߯ ߘߌ߫߸ ߡߊ߲߬ߘߋ߲ ߠߎ߫ ߟߋ߬ ߛߎߋ߫. ߊ߬ߟߋ߬ ߞߊ߲ߓߏߟߏ߲ ߏ߬ ߝߍ߲߬ߛߍ߲߬ߣߍ߲߫ ߡߊ߬ߟߌ ߕߟߋ߬ߓߋ ߣߌ߫ ߛߣߍ߬ߞߊߟߌ߫ ߥߙߏ߬ߘߎ߮ ߣߌ߫ ߜ߭ߊ߲ߓߌ߫ ߣߌ߫ ߖߌ߬ߣߍ߫ ߞߐ߮ߘߎ߮ ߕߟߋ߬ߓߋ߬ ߝߊ߲ ߣߌ߫ ߓߌߛߊߏ߫ ߖߌ߬ߣߍ߫ ߟߋ߬ ߘߐ߫ ߛߌߛߍ߲߬߸ ߞߏ߬ߣߌ߲߬ ߓߊߏ߬ ߊ߬ ߣߌ߫ ߖߊ߬ߞߊ߲߬ߒߞߋ ߟߎ߬ ߟߊ߫ ߞߊ߲ߓߏߟߏ߲ ߓߍ߯ ߞߊ߫ ߛߎ߬ߘߎ߲߬ߓߊ ߟߋ߬߸ ߏ߬ ߟߋ ߣߵߊ߬ ߞߍ߫ ߟߊ߫ ߊ߰ ߝߐ߫ ߟߊ߫ ߏ߬ ߟߎ߫ ߡߊ߬ ߖߌ߬ߣߍ߬ ߞߣߐ߫ ߞߏ߫ ߖߊߞߊ߲߬ߒߞߋ߸ ߤߊߞߍߕߏ߫ ߏ߬ ߟߎ߬ ߘߌ߫ ߡߊߦߋߙߋ߲߫ ߏ߬ ߟߊ߫ ߞߵߊ߬ ߣߌ߫ ߡߊ߬ߣߌ߲߬ߞߊ ߓߐ߫ ߢߐ߲߮ ߡߊ߬ ߘߏߣߍ߲߫߸ ߞߵߊ߬ ߕߘߍ߬ ߜߎ ߡߊ߲߬ߘߋ߲߬ߞߏ ߟߋ߬ ߊ߬ ߝߊ߲߬ ߞߋߟߋ߲ ߕߐ߮ ߘߌ߫ ߜ߭ߊ߲ߓߌ߫ ߟߎ߫ ߘߐ߫߸ ߏ߰ ߟߋ߬ ߖߐ߫ ߦߏ߫ ߞߐ߬ߣߌ߲߬ߧߊ߫ ߞߊ߲ߓߏߟߏ߲ ߝߊ߲߬ߞߋߟߋ߲ ߡߍ߲ ߦߋ߫ ߞߘߏߥߊߙߌ߫ ߏ߬ ߦߋ߫ ߖߎ߬ߟߊ߬ ߕߐ߮ ߞߘߐ߫ ߢߊ ߡߍ߲ ߖߐ߫߸ ߓߊ ߖߎ߬ߟߊ ߏ߬ ߟߎ߫ ߡߊ߬ߣߌ߲߬ߞߊ߬ ߕߐ߮ ߟߋ߬ ߞߘߐ߫ ߛߓߍ ߟߎ߬ ߞߣߐ߫ ߖߡߊ߬ߣߊ ߏ߬ ߘߐ߫߸ ߞߐ߬ߣߌ߲߬ߧߊ ߟߎ߬ ߝߣߊ߫ ߦߋ߫ ߡߊ߬ߣߌ߲߬ߞߊ߬ ߕߐ߯ ߞߋߟߋ߲ ߏ߬ ߟߋ ߞߘߐ߫ ߖߌ߬ߣߍ߫߸ ߞߏ߬ߣߌ߲߬ ߖߘߍ߬ߡߊ߬ߦߋߙߋ߲ ߠߋ߫ ߣߊ߬ ߞߐ߬ߣߌߢߊ ߕߏ߫ ߟߴߊ߬ ߡߊ߬ ߞߵߊ߬ ߣߌ߫ ߡߊ߬ߣߌ߲߬ߞߊ ߘߊ߲߬ߝߘߊ߬ߓߐ߫ ߣߍ߲ߞߍ߫߸ ߞߵߊ߬ ߕߘߍ߬ ߏ߬ ߖߍ߬ߘߍ ߛߞߊߣߌ߲ ߠߋ߬. ߌ ߦߴߊ߬ ߟߐ߫ ߡߊ߲߬ߘߋ߲߬ߞߏ ߟߎ߬ ߡߊߟߐ߲ߣߍ߲ߓߊ ߟߋ߬ ߡߊ߲߬ߘߋ߲߬ ߛߏߡߐ߯ߦߊ ߣߴߊ߬ ߟߐ߲ߠߌ߲ߧߊ ߟߊߞߎߣߎ߲ ߘߐ߫߸ ߞߊߕߙߍ߬ߕߍ߫ ߞߏߙߊ߫ ߖߋߟߌߦߊ ߡߊ߬߸ ߝߏ߫ ߛߌ߰ߟߌ ߞߍߢߊ ߘߏ߫ ߓߍ߫ ߦߋ߲߬ ߊ߬ߟߎ ߞߊ߲߫ ߏ߬ ߡߊ߬ ߟߋ߬ ߞߏ߫ ߞߏߊߖߋߟߌߛߌ߮߸ ߞߊ߬ߙߊ߲߬ߘߋ߲߬ߛߌ߮ ߞߊ߬ߣߌ߲߫ ߥߟߊ߫ ߞߍ߬ߙߍ߲߬ߘߍ߬ߛߌ߮߸ ߓߊߏ߬ ߓߟߊ ߘߌߦߊߣߍ߲߫ ߡߊ߲߬ߘߋ߲߫ ߝߊ߲߭ ߘߏ߫ ߦߋ߫ ߢߊ ߡߍ߲ ߞߊ߬ ߞߏ߬ߣߌ߲ ߘߌߦߊ߫ ߘߏ߫ ߦߋ߫߸ ߞߊ߬ ߓߐ߬ߟߐ߲ ߘߌߦߊ߫ ߘߏ߫ ߦߋ߫ ߞߊ߬ ߘߎ߲߬ߘߎ߲߬ߓߊ ߘߌߦߊ߫ ߘߏ߫ ߦߋ߫߸ ߞߊ߬ ߖߋ߲߬ߓߋ ߘߌߦߊ߫ ߘߏ߫ ߦߋ߫߸ ߊ߬ߟߎ ߕߊ߫ ߘߌߦߊߣߊ߲ߝߋ߲ ߏ߬ ߞߍߣߍ߲߫ ߞߏߙߊ ߟߋ߬ ߘߌ߫. ߊ߬ ߓߌ߬ ߝߐߟߌ߫ ߘߐ߫߸ ߓߌ߬ߟߊ߬ߢߐ߲߰ߡߊ ߛߌߟߊ ߟߊߛߌߦߊߦߊ ߓߘߊ߫ ߞߍ߫ ߛߌߟߊ߫ ߢߌߡߊ߫ ߘߌ߫ ߞߊ߬ ߞߊ߲ߓߏߟߏ߲ ߓߍ߯ ߟߊߛߐ߲ߞߐ߫ ߞߎߡߊߓߘߊߛߏ ߟߎ߬ ߣߌ߫ ߖߌ߬ߦߊ߬ߞߊ߲ ߠߎ߬ ߣߌ߫ ߓߟߐߟߐ ߟߎ߬ ߣߌ߫ ߞߊ߬ߝߊ ߟߎ߬ ߞߣߐ߫߸ ߊ߬ ߣߌ߫ ߤߊߟߌ߬ ߞߊ߬ߙߊ߲߬ ߦߙߐ ߟߎ߬ ߘߐ߫߸ ߞߊ߬ ߞߍ߫ ߞߊ߲ߓߏߟߏ߲ ߠߎ߫ ߘߎ߲߬ߘߎ߬ߡߊ ߟߎ߫ ߞߊ߬ߟߊߡߊ߬ ߓߘߍߞߍ߭߸ ߞߊ߬ ߕߊ߬ߡߌ߲߬ ߢߐ߲߯ ߢߊߦߋ ߝߊ߲߬ߞߊߘߏ߲߬ ߠߊ߫߸ ߞߊ߬ ߞߎߡߊߘߋ߲߫ ߡߊ߲߬ߘߌߡߊ߲ ߠߎ߬ ߝߣߊ߫ ߝߎ߲߫ ߕߎ߬ߡߊ ߟߎ߫ ߞߊ߲߬߸ ߪ ߕߊ߫ ߡߙߌ߫ ߘߐ߫ ߏ߬ ߘߌߣߊ߬ ߘߍ߬ߡߍ߲߬ ߞߍ߫ ߊ߬ߟߎ߬ ߕߍ ߝߏ߬ߣߊ߲ ߘߐߜߐ߬ߙߐ ߘߐ߫ ߞߏߛߓߍ߫. ߓߊߏ߬߸ ߞߏ߫ ߡߐ߰ ߣߴߌ ߞߊ߲߫ ߝߐ߫ ߢߐ߲߯ ߜߘߍ ߡߍ߲ ߕߍ߫ ߞߊ߲ߓߏߟߏ߲ ߞߋߟߋ߲߫ ߝߐ߫ ߟߊ߫߸ ߞߏ߫ ߌ ߣߴߏ߬ ߓߊ߯ ߟߐ߯ߕߍ ߞߍ߫ ߢߐ߲߮ ߝߍ߬ ߞߴߌ ߘߴߊ߬ ߟߊ߫ ߞߎߡߊ ߓߍ߯ ߢߊߦߋ߫ ߥߟߍߟߍ߫߸ ߣߴߏ߬ ߞߍ߫ ߘߊ߫ ߕߎ߬ߢߊ߬ ߘߌ߫߸ ߝߊߦߌߘߊ ߊ߲ ߞߊ߲ߓߏߟߏ߲ߢߐ߲߮ ߏ߬ ߟߎ߬ ߓߘߊ߫ ߛߋ߫ ߊ߲ ߝߍ߬ ߊ߲ ߠߊ߫ ߓߏ߲ ߣߴߊ߲ ߠߊ߫ ߛߏߘߋ߲ ߠߎ߬ ߞߣߐ߫ ߓߌ߬߸ ߞߵߏ߬ ߞߎ߲߭ ߞߍ߫ ߟߊ߬ߛߋ߬ߟߌ߬ߢߊ߬ߥߙߍ ߡߎ߬ߙߊ߲ ߠߎ߬ ߘߝߊ ߘߌ߫ ߓߟߏߟߊ߫. ߣߌ߲߬ ߠߋ߬ ߘߏ߲߬ ߦߋ߫ ߞߊ߲߬ ߞߊ߬ ߣߊ߬ ߡߊ߬ߘߏ߲߬ ߢߐ߲߰ ߠߊ ߣߌ߫ ߢߐ߲߯ ߢߊߦߋ ߘߌ߫߸ ߞߵߊ߬ߟߎ߬ ߟߊߥߙߊ߬ ߓߘߍߞߍ߭ ߞߊ߬ ߝߐߢߐ߲߯ߞߐ ߕߌ߲ߕߊ߲ ߠߊߘߐ߯ߦߊ߫ ߝߎ߫ߍ߲߫.

ߥߙߏߘߎ߱

ߥߙߏ߬ߘߎ߯: ߡߊ߲߬ߘߋ߲ ߘߊ߬ߙߌ߬ߣߊ߲߬ߞߏ ߘߏ߫ ߟߋ߬ ߝߋ߲ ߠߎ߬ ߞߟߌ ߘߌ߫ ߊ߬ ߞߍߢߊ ߟߊ߫߸ ߊ߬ ߟߊߓߊ߯ߙߊ߫ ߢߊ ߟߊ߫߸ ߊ߬ ߣߴߊ߬ ߞߍ߫ ߦߙߐ ߟߊ߫߸ ߏ߬ ߟߋ ߞߵߊ߬ߟߎ߫ ߟߐ߬ ߊ߬ ߝߐ߫ ߟߊ߫ ߣߍ߰ߛߏ ߣߌ߫ ߕߊߖߌ ߣߌ߫ ߛߊ߲ߡߊߞߎߟߎ߲ ߠߎ߬ ߕߐ߯ߟߊ߫ ߟߊ߫ ߢߊ ߏ߬ ߞߊ߲߬߸ ߓߊߏ߬ ߊ߬ߟߎ߬ ߦߋߣߴߏ߬ ߞߍߢߊ ߟߋ߫ ߡߊ߬߸ ߞߊ߬ ߖߐߣߊ߲߸ ߕߏߘߌ߸ ߞߎ߬ߘߎ߸ ߗߊߘߏ ߟߎ߬ ߝߣߊ߫ ߕߐ߯ߟߊ߫ ߊ߬ߟߎ߬ ߟߊߓߊ߯ߙߊ ߡߊ߬߸ ߞߊ߬ ߞߐߘߐ߲߸ ߘߎ߰ߟߊ߫߸ ߛߊ߲ߘߐ߫ ߟߎ߫ ߕߐ߯ߟߊ߫ ߞߊ߬ߟߊ ߘߌ߫ ߞߊ߬ߓߍ߲߬ ߏ߬ ߟߎ߬ ߞߍߢߊ ߡߊ߬ ߦߙߐ ߘߌ߫. ߒ߬ߓߊ߬ ߕߐ߯ߟߊߟߌ ߞߍߢߊ߫ ߞߋߟߋ߲ ߏ߬ ߟߋ ߟߊߓߊ߯ߙߊߣߍ߲߫ ߞߊ߬ ߞߐ߰ߘߎ߮ ߣߌ߫ ߥߙߏ߬ߘߎ߮ ߞߍ߫ ߞߐ߰ߘߎ߯ ߣߌ߫ ߥߙߏ߬ߘߎ߯ ߘߌ߫߸ ߞߐ߰ߘߎ߯ ߟߊߦߟߍ߬ߣߍ߲߫ ߡߊ߲߬ߘߋ߲߫ ߕߊ߲ߓߊ߲ ߛߊ߲ߝߍ߫ ߘߌ߲ߞߌߙߊ ߟߎ߫ ߞߎ߲߬ ߏ߬ ߟߋ ߘߐ߫߸ ߣߊ߫ ߟߊߞߍ߫ ߞߐ߮ ߣߌ߫ ߓߌߦߊ߲ ߠߎ߬ ߘߟߊߘߌߦߊ߫ ߞߐ߮ ߟߎ߬ ߦߋ߫ ߓߐ߫ ߟߊ߫ ߦߋ߲߬ ߡߍ߲ ߘߐ߫. ߞߊ߲߬ ߥߙߏ߬ߘߎ߯ ߝߣߊ߫ ߟߊߦߟߍ߬ ߡߊ߲߬ߘߋ߲߫ ߓߊ߬ߘߊ ߘߎ߰ߟߊ߬ ߘߌ߲ߞߌߙߊ ߟߎ߬ ߝߣߊ߫ ߞߎ߲߬߸ ߊ߬ߟߎ߬ ߟߊ߫ ߣߊߡߎ߲߫ ߠߊߕߋߟߋ߲߫ ߦߙߌߘߋ߲߫ ߓߛߍ ߏ߬ ߦߋ߫ ߓߐ߫ ߟߊ߫ ߦߋ߲߬ ߡߍ߲ ߠߎ߬ ߘߐ߫߸ ߞߵߊ߬ ߟߊߓߊ߯ߦߊ߫ ߡߐ߰ߓߊ߬ ߡߊ߬ߓߏ߲ߧߊ ߣߌ߫ ߝߘߎ ߣߌ ߘߋ߲ߠߊߓߐ ߣߌ߫ ߞߟߍ߬ߓߊ߲ ߣߌ߫ ߛߐߟߌ ߣߌ߫ ߡߐ߰ߦߊ ߟߊߕߊ߯ߡߊ ߣߴߊ߬ ߘߐߘߌߦߊ߫ ߞߏ ߓߍ߯ ߘߐ߫߸ ߊ߬ ߣߌ߫ ߘߊ߲߬ߞߎ߲߬ߛߐ ߣߌ߫ ߖߏ߬ߛߏ ߣߌ߫ ߛߏߡߦߊ ߘߊߞߎ߲߫ ߛߌߦߊߡߊ߲߫ ߘߐ߫. ߒ߬ߓߊ߬ ߡߊ߲߬ߘߋ߲ ߠߎ߬ ߟߊ߫ ߣߊߡߎ߲߫ ߝߋ߲߫ ߢߊ߬ߒ߬ߞߐ߬ߓߊߟߌ ߏ߬ ߓߐ߫ ߦߙߐ ߕߊ߯ߣߌߛߊߦߌ ߞߎ߲߬ߠߊ߬ߝߎߟߋ߲ ߞߏߛߐ߲߬ ߡߊ߲߬ߘߋ߲߬ ߛߏߡߐ߯ߦߊ ߣߴߊ߬ ߥߙߎߞߌ ߞߎ߲߬ߕߊ߮ ߞߘߐ߫߸ ߏ߬ ߝߙߊ߬ߣߍ߲ ߥߙߏ߬ ߦߙߌ ߕߌ߲߬ߞߎߘߎ߲ ߞߍ ߞߊ߲߬ ߛߣߍ߬ߘߎ߰ ߢߌߡߊ ߘߌ߫߸ ߊ߬ ߣߌ߫ ߓߊߟߏ ߣߌ߫ ߘߊߦߟߌߡߍ ߣߐ߰ߦߊ߬ ߦߙߐ ߛߣߍ߬ߝߋ߲ ߠߊ߫ ߛߐ߲߭ ߣߴߊ߬ ߟߊ߫ ߢߊ߭ ߣߴߊ߬ߛߊ߬ߡߊ ߞߎ߲߬ߕߊ߮ ߖߊ߲߬ߧߊ ߝߏ߫ ߡߐ߰ ߘߌ߫ ߛߎ߬ߡߊ߲ ߘߏ߫ ߟߎ߫ ߟߊߘߏ߲߬ ߞߏ߫ ߝߌ߬ߟߊ߬ ߣߌ߫ ߛߓߊ߬ ߞߍ߫ ߛߊ߲߬ ߞߋߟߋ߲ ߘߐ߫߸ ߏ߬ ߟߋ ߞߊ߬ ߡߊ߲߬ߘߋ߲߫ ߡߌ߬ߙߋ߲߬ߘߌ ߞߎ߲߬ߠߊ߫ ߘߎ߰ ߞߟߏ߫ ߊ߬ߙߌ߬ߖߣߍ߬ߟߊ߬ߡߊ ߏ߬ ߞߊ߲߬ ߞߊ߬ߦߌ߯. ߕߎ߬ߡߊ ߟߊߖߊ߲߰ߧߊ ߟߋ߫ ߣߊ߬ߣߍ߲߫ ߖߡߊ߬ߣߊ ߏ߬ ߟߎ߬ ߞߍ߫ ߟߊ߫ ߡߊ߲߬ߘߋ߲ ߠߎ߬ ߓߘߊ ߘߌ߫ ߦߋ߲߬ ߛߌ߰ߓߊ߰ ߝߟߐ ߟߎ߫ ߝߍ߬ ߕߍߓߍ߲ ߣߌ߫ ߞߊ߲ߓߍ߲ ߞߐ߬ߣߐߡߊ߬߸ ߏ߬ ߞߏߛߐ߲߬ ߤߊߟߌ߫ ߓߌ߬ ߡߐ߰ ߕߍ߫ ߢߐ߲߯ ߟߊ߲ߝߊ߲߫ ߞߟߍ߫ ߟߊߞߊ߬ߟߌ߬ߣߍ߲߬ ߛߌ߫ ߦߋ߫ ߟߴߊ߬ߟߎ߬ ߣߴߏ߬ߟߎ߬ ߕߍ ߘߐ߬ߝߐ ߘߐ߫߸ ߦߙߐ ߏ߬ ߟߎ߫ ߟߋ߬ ߣߊ߬ߣߍ߲߬ ߞߍ߫ ߟߊ߫ ߖߌߣߍ߫ ߥߙߏ߬ߘߎ߮ ߘߌ߫ ߓߌ߬߸ ߊ߬ ߣߌ߫ ߞߘߏߥߊߙߌ߫ ߣߌ߫ ߟߊߓߙߌߦߊ߫ ߣߌ߫ ߛߙߊ߬ߟߏ߲. ߞߣߍ ߏ߬ ߡߌ߬ߙߌ߲߬ߘߌ ߕߏ߫ ߘߊ߫ ߡߊ߲߬ߘߋ߲߬ ߡߊߛߐ߫ ߟߴߊ߬ߟߎ߬ ߟߊ߫ ߦߙߌ߫ ߓߛߍ ߏ߬ ߥߟߏߒߘߐ ߟߎ߬ ߟߊ߫ ߝߎߚߎ߫ ߝߏ߫ ߡߊ߲߬ߘߋ߲ ߢߊ߬ ߢߊ߫ ߕߍ߫ ] ߞߐ߫ ߡߎ߬ߕߎ߲߬߸ ߊ߬ ߓߊ߲ ߞߐ ߞߍ߫ ߟߊ߫ ߣߊߡߎ߲ ߝߊ߲߭ ߘߏ߫ ߘߌ߫ ߊ߬ ߣߌ߫ ߡߐ߰ߦߊ ߟߊߕߊ߯ߡߊ߫ ߝߋ߲ ߡߍ߲ ߓߘߊ߫ ߞߍ߫ ߢߊ߬ߒ߬ߞߐ߬ߓߊߟߌ ߘߌ߫߸ ߝߏ߫ ߝߘߎ ߕߐ߮ ߓߘߊ߫ ߞߍ߫ ߥߙߏ߬ߕߊ߲ ߘߌ߫ ߡߌ߬ߙߌ߲߬ߘߌ ߝߣߍ߬ߝߣߍ ߘߏ߫ ߟߎ߫ ߓߟߏ߫ ߊ߬ ߞߎ߬ߘߎߜߟߍ߬ߦߊ ߡߊ߬. ߒ߬ߓߊ߬ ߊ߬ ߓߌ߬ ߝߐߟߌ߫ ߘߐ߫߸ ߡߊ߬ߣߌ߲߬ߞߊ߫ ߦߌ߬ߙߌ߲߬ߘߌ߬ߣߍ߲ ߏ߬ ߟߎ߬ ߦߋ߫ ߕߎ ߞߘߐ߫ ߛߊ߫߸ ߒ߬ߞߵߊ߬ߟߎ߬ ߦߴߊ߬ߟߎ߬ ߓߘߊ ߟߎ߫ ߟߋ߬ ߘߐ߫ ߏ߬ ߘߌ߫ ߡߎ߬ߕߎ߲߬ ߞߊ߬ߓߌ߯ ߡߊ߲߬ߘߋ߲߫ ߡߊ߬ߖߌ߮ ߕߎ߬ߡߊ߸ ߛߊ߬ߡߏ߬ߙߌ߬ ߕߟߋ ߣߊ߬ߣߴߏ߬ ߕߘߍ߬ ߟߊ߫ ߕߋ߲߬ ߠߋ߬߸ ߕߎ߬ߓߊ߬ߓߎ ߟߊ߫ ߓߋ߬ߒ߬ߞߊ߲߬ߠߌ߲߬ ߕߟߋ ߝߣߊ߫ ߞߵߊ߬ ߛߐ߬ߘߐ߲߫ ߦߋ߲߬߸ ߞߣߊ߬ ߖߡߊ߬ߣߊ߬ ߞߎ߬ߘߊ߬ ߞߏ ߟߎ߫ ߓߌ߬ߟߴߊ߬ߘߐ߫ ߞߐ߲ߛߐ߲ߧߊ ߣߐ߬ ߞߟߊߡߊ߲ ߞߊ߲߬ ߞߵߊ߬ ߕߏ߫ ߏ߬ ߡߊ߬߸ ߒ߬ߓߊ߬ ߊ߲ ߧߴߏ߬ ߕߎ߬ߡߊ ߟߋ߬ ߘߐ߫ ߣߌ߲߬ ߤߊߟߌ߫ ߓߌ߬.